1

O AECT Rio Minho aproba as contas e o informe de actividades do 2018

A entidade centrou os seus esforzos na mellora cooperación transfronteiriza e o apoio a proxectos europeos que se están a desenvolver no territorio.

 

A Asemblea Xeral do Agrupamento Europeo de Cooperación Territorial do Río Miño (AECT Rio Minho) reuniuse onte en Valença para aprobar as Contas e o Informe de actividades correspondentes ao periodo de 2018.

Segundo explicou o director do AECT Rio Minho, Uxío Benítez, durante o 2018, a entidade concentrou gran parte dos seus recursos en actividades de consolidación institucional na rexión a través de dinámicas locais de cooperación transfronteiriza, no apoio á implementación do proxecto ‘Smart Miño’, cofinanciado polo Interreg V-A, e na presentación do Agrupamento Europeo de Cooperación Territorial do Río Miño ante relevantes entidades rexionais, nacionais e europeas.

Así mesmo, segundo apuntou Benítez, houbo tamén un esforzo moi significativo na promoción de actividades que contribúan á preservación e valorización do Río Miño Transfronteirizo, como a creación da marca ‘Río Miño’, unha acción enmarcada no proxecto ‘Visit Rio Minho’, do que tamén son socias a Deputación de Pontevedra e o CIM Alto Minho, e que conta igualmente con cofinanciamento do programa Interreg V-A.

Promoción da marca Rio Minho

Precisamente, reforzar a difusión desta nova marca para o territorio e a súa consolidación como elemento identificativo da xeografía miñota, será un dos principais eixos de actuación do AECT neste 2019.

Ademais, o AECT  presentou unha nova candidatura aos fondos europeos, o proxecto  Red Lab Minho, cun investimento global de arredor de 431.745 euros e dirixido á dirixido a apoiar as dinámicas bilaterais de cooperación transfronteiriza do territorio do AECT Rio Minho, que se espera que sexa aprobado nas próximas semanas.

Por último, Benítez destacou tamén o labor de soporte regular que, no ámbito do protocolo realizado coa Câmara Municipal de Vila Nova de Cerveira, se lle deu ao proxecto “Amizade Cerveira-Tomiño”.

O informe de contas, relativo aos seis meses de xestión en 2018, de xullo a decembro, contempla un orzamento global de 62.326,70 euros, dos que foi executado o 75%, é dicir 45.963,51 €.

Disolución de Uniminho

Por outra parte, a Asociación do Val do Miño Transfronteirizo (Uniminho) puxo hoxe o punto final a un traballo de máis de dez anos, cuxas funcións e proxectos agora “herdará” o AECT Rio Minho, nunha lóxica de continuidade na persecución dos mesmos obxectivos globais.




O Río Miño transfronteirizo contará cun Plan de Mobilidade Sustentable centrado nos desprazamentos entre as eurocidades

A AECT Río Miño destacou que esta é a fronteira máis transitada da península ibérica e un dos primeiros plans “transfronteirizos” do mundo

 

O estudo abranguerá 26 municipios e máis de 3.300 km2

 

O territorio do Río Miño Transfronteirizo contará cun plan de mobilidade sustentable que favoreza os desprazamentos de persoas e vehículos na fronteira galego portuguesa, prestando especial atención aos fluxos entre os polos urbanos das eurocidades, nos que se concentran máis de 100.000 habitantes. Así o anunciou hoxe o deputado de Cooperación Transfronteiriza e director da AECT Río Miño, Uxío Benítez, nun acto no que estivo acompañado polos alcaldes da eurocidade Tui – Valença, Carlos Vázquez Padín e Jorge Salgueiro Mendes, e o presidente da câmara municipal de Vila Nova de Cerveira e vice director da AECT Río Miño, Jõao Fernando Brito Nogueira.

Segundo explicou o director da AECT Río Miño “este plan supón unha necesaria visión global da mobilidade”, coa característica especial de “ser un plan tranfronteirizo, un dos poucos deste tipo que existen no mundo”. Benítez lembrou que xa se están redactando plans de mobilidade a nivel galego, comarcal e nos concellos, pero “parece que do outro lado do río Miño non hai nada, a pesar de que estamos a falar da fronteira ibérica máis transitada”. Neste senso o director da AECT Río Miño destacou que “nós queremos rachar por completo con ese concepto de fronteira, e queremos realizar un diagnóstico que nos dea unha visión máis acertada desta área xeográfica, que é un territorio común.”

Punto de partida

O Plan de Mobilidade Sustentable do Río Miño Transfronteirizo (PMST) é unha das principais accións do proxecto Smart Minho -enfocado na planificación conxunta e intelixente do espazo transfronteirizo e cofinanciado ao 75% polo Fondo Europeo de Desenvolvemento Rexional- .

O PMST terá como punto de partida dous documentos previos: a ‘Estratexia do Río Miño Transfronteirizo 2030’ e o ‘Plano de Transporte Público do Vale do Rio Miño Transfronteiriço’, un detallado traballo elaborado por UNIMINHO en 2012.

“A participación cidadá xogará un papel importante no deseño deste plan” que se levará a cabo  mediante a realización de enquisas, tanto a pé de rúa como a través da páxina web de Smart Minho, e a organización de varios obradoiros, en territorio galego e portugués, nos que “o tecido asociativo e económico do territorio poderá achegar tanto ideas como as problemáticas ás que se enfrontan no seu día a día en materia de mobilidade”.

Especial énfase nas eurocidades

O plan estudará especialmente a mellora dos desprazamentos entre os tres pares de núcleos urbanos que compoñen as eurocidades de Tomiño – Cerveira, Tui – Valença e Salvaterra – Monçao, que aglutinan un tercio do total da poboación do territorio. Nesta liña se manifestaron os representantes das alcaldías e cámaras municipais presentes, agradecendo os esforzos realizados pola Deputación de Pontevedra na área transfronteiriza para fomentar o traballo en común do territorio galego portugués.

O estudo abrangue máis de 3.300 km2 de territorio, inclúe a 26 municipios galegos e portugueses, e a unha poboación de ao redor de 376.000. Unha vez recompilada e analizada toda a información obtida a través das enquisas e obradoiros, poderanse extraer as primeiras conclusións e establecer unha visión global do conxunto da mobilidade na área do río Miño transfronteirizo, cunha proposta de accións piloto lista para desenvolver no inmediato, segundo informou o deputado.




Medio milleiro de persoas participaron directamente na elaboración da ‘Estratexia Río Miño Transfronteirizo 2030′

O II Fórum do Río Miño Transfronteirizo celebrado en Tomiño supuxo o cumio do proceso participativo da elaboración da ‘Estratexia Río Miño Transfronteirizo 2030′, na que segundo se deu a coñecer esta mañá, participaron directamente preto de 500 persoas. A presidenta da Deputación de Pontevedra, Carmela Silva, e o deputado de Cooperación transfronteiriza, Uxío Benítez, presentes no acto, coincidiron a sinalar o positivo destes datos e a importancia que a poboación do territorio tivo como protagonista e principal beneficiaria desta iniciativa do proxecto Smart Minho, do que forman parte a Deputación de Pontevedra, o CIM Alto Minho, a Fundación Centro de Estudos Eurorrexionais (FCEER) e a AECT Río Miño.

Máis dun cento de persoas déronse cita neste segundo encontro, onde tiveron a oportunidade de coñecer e debater as primeiras conclusións do traballo de análise do territorio que comezou a finais de 2017. Os diferentes mecanismos postos en marcha, que incluíron cinco mesas sectoriais, unha enquisa online, dous fórums públicos e numerosas reunións con ata 13 concellos e câmaras municipais, permitiron realizar un traballo profundo e realista.

O director da FCEER e coordinador da elaboración da estratexia, Valerià Paül, enfatizou a importancia de contar cun documento guía coma este xa que “existen poucos territorios transfronteirizos en Europa e no mundo que teñan unha estratexia común, e que teñan claramente unha idea do que queren ser e facer. Ademais, os documentos estratéxicos normalmente están trazados a unha escala dos territorios marcados polos espazos de soberanía dos estados, e neste caso, rompemos con isto”. Tras un ano de elaboración da Estratexia, no que se realizaron máis de 45 entrevistas, Paül asegurou que “neste caso podemos dicir que hai unha vontade moi clara de deseñar proxectos reais e obxectivos, que sexan moi operativos, sendo o turismo un eixo estrutural”. Proba diso son as máis de 80 intervencións e proxectos deseñados durante estes meses, recollidos no Plan de Accións que acompaña ao documento guía.

A segunda ITI transfronteiriza de Europa

A presidenta da Deputación de Pontevedra, Carmela Silva, deu alabanza a este proxecto innovador que ten a poboación do territorio como protagonista e partícipe e sinalou que “no século XXI non podemos deixar de contar coa intelixencia da cidadanía neste tipo de proxectos”. Silva lembrou hai 2000 anos “este territorio era o centro da relación económica entre o Atlántico e o Mediterráneo e non a periferia, e que hoxe esta iniciativa da valor e recoñece a nosa posición central, o noso dinamismo e a nosa creatividade”.

O deputado de Cooperación Transfronteiriza e director da AECT Río Miño, Uxío Benítez, resaltou “grazas á Estratexia, por primeira vez temos unha visión do territorio como un espazo único” e anunciou que a AECT Río Miño, “con este documento na man que demostra que sabemos o que queremos e onde queremos chegar” reivindicará que “contamos coas condicións obxectivas para acometer no territorio proxectos piloto de cooperación transfronteiriza en todos e cada un dos concellos e cámaras e ademais, podemos converternos na segunda experiencia a nivel europeo de crear un Investimento Territorial Integrado transfronteirizo (ITI) que permita aplicar fondos europeos desde unha visión global do territorio”.




II FÓRUM DO RÍO MIÑO TRANSFRONTEIRIZO

29 de novembro de 2018

Auditorio de Goián-Tomiño

 

Organizan: Deputación de Pontevedra, AECT Río Minho, Comunidade Intermunicipal do Alto Minho e Fundación Centro de Estudos Eurorrexionais (FCCER)

Actividade encadrada no proxecto SMART MINHO-ESTRATEXIA DE COOPERACIÓN INTELIXENTE DO RÍO MIÑO TRANSFRONTEIRIZO, cofinanciado nun 75 % polo FEDER a través do POCTEP 2014-2020.

 

 

PROGRAMA

(hora local)

 

10:30 h    Recepción de participantes, recollida das credenciais e documentación

 

11:00 h    Acto de apertura

Participantes:

– Sandra González, alcaldesa de Tomiño

Manuel Reigosa, presidente da Fundación Centro de Estudos Eurorrexionais (FCEER) e reitor da Universidade de Vigo

Carmela Silva, presidenta da Deputación de Pontevedra

Fernando Brito Nogueira, presidente da Câmara municipal de Vila Nova da Cerveira

 

11:30 h  Inicio da sesión

               MESA: A ESTRATEXIA DE COOPERACIÓN DO RÍO MINHO TRANSFRONTERIZO 2030

Presenta e modera: Uxío Benítez, director do Agrupamento Europeo de Cooperación Territorial do Río Miño (AECT Río Miño), deputado de Cooperación Transfronteiriza da Deputación de Pontevedra

“A participación dos actores territoriais no proceso estratéxico”

Relator: Manuel Rodríguez, técnico da FCCER

“A estratexia para o Río Minho Transfronteirizo 2030”

Relator: Valerià Paül, director do FCCER

 

12:30 h  Pausa para o café

 

13:00 h  Inicio da sesión

               MESA: PROPOSTAS DE FUTURO PARA O TERRITORIO TRANSFRONTEIRIZO DO MINHO

Presenta e modera: Fernando Brito Nogueira, vice-director AECT Río Miño, presidente da cámara municipal de Vila Nova de Cerveira

Relatores: 

    · Xavier Martínez Cobas (Universidade de Vigo)

                   · José Rio Fernandes (Universidade do Porto)

                   · Francisco Carballo Cruz (Universidade do Minho)

                   · Sandrina Antunes (Universidade do Minho)

 

13:15 h  Clausura

Xosé Lago García, Subdirector xeral de Acción Exterior e de Cooperación Transfronteiriza da Xunta de Galicia

– Esther Silva, vicepresidenta da Comisão de Cooperação Desenvolvemento Região Norte (CCDR-N)

– Uxío Benítez, director da AECT Río Miño e deputado de Cooperación Transfronteiriza da Deputación de Pontevedra

Jose María Costa, presidente da CIM-Alto Minho

 

13:30 h  Brunch/Networking

 




Abrimos un espazo virtual de participación para toda a cidadanía transfronteiriza!

Instamos a participar para achegar opinións, necesidades ou suxestións sobre o futuro e o desenvolvemento do territorio da raia


As persoas interesadas en participar poderán facelo a través da web

 

O proceso participativo da ‘Estratexia de Cooperación do Río Miño Transfronteirizo 2030’ pretende chegar a toda a cidadanía do territorio da raia e coñecer cales son as súas opinións sobre como tirar rendemento de forma conxunta das potencialidades naturais e económicas que existen en ámbalas dúas marxes. Para iso vén de poñerse en marcha unha enquisa virtual a través da páxina web do proxecto europeo Smart Minho -impulsado pola Deputación de Pontevedra e,  CIM Alto Minho e a Fundación CEER-.

A través desta enquisa todas aquelas persoas vencelladas dalgún xeito ao territorio do Río Miño Transfronteirizo poderán plasmar as súas opinións, necesidades e suxestións, reflectindo así cales son os elementos que consideran máis relevantes, a súa valoración sobre determinados servizos (actividades culturais, mobilidade, servizos de educación e saúde, entre outros), ou o seu parecer sobre aspectos concretos como, por exemplo, o desenvolvemento dunha marca específica para os produtos locais ou a creación dunha marca turística.

Coa información obtida, analizada e procesada, elaborarase un informe de participación no que esta enquisa será un fluxo de información moi relevante para proceder á incorporación dos diferentes resultados do proceso á versión definitiva da Estratexia final e o seu Plan de Acción. Toda a información do proceso participativo está dispoñible no seguinte enlace:  http://smartminho.eu/participa/.

Esta enquisa a través da web do proxecto permitirá completar outros mecanismos de participación como son as mesas sectoriais que arrancaron o pasado 24 de setembro e que están decorrendo cun gran éxito de participación. Segundo explica o presidente da AECT Rio Minho, Uxío Benítez, é moi importante contar coa máxima participación co fin de que as futuras liñas de actuacións sexan consensuadas entre todas as partes implicadas tanto de xeito directo como indirecto.

O nacionalista insiste, de feito, en que aquelas persoas que non poidan asistir ás mesas sectoriais se sumen igualmente ao proceso de participación cidadá aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto até finais de outubro deste ano. “Todas as aportacións, por pequenas que sexan, suman información para poder potenciar un territorio tan rico como o do Miño na boa dirección”, finalizou.

A ‘Estratexia de Cooperación Intelixente’ do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




Apostan pola creación dunha ‘Feira Cultural do Miño’ para reunir industrias e público de ambas beiras do río

A última mesa de participación para elaborar a ‘Estratexia 2030’ do territorio transfronteirizo propón potenciar o comercio nos centros das vilas fronte ás grandes superficies das aforas

 

Crear unha programación cultural propia no territorio transfronteirizo do Miño e poñer en marcha unha feira, un ‘Culturgal do Miño’, que potencie as industrias e actores culturais de ambas beiras do río e os poña en contacto co público: esas deben ser as apostas no eido cultural dentro da eurorrexión. Así o indicaron os participantes na última mesa de traballo organizada dentro do proceso de elaboración da ‘Estratexia 2030’, un documento-guía que busca desenvolver o territorio transfronteirizo dende múltiples perspectivas.

Estas ideas foron expostas por unha trintena de persoas de asociacións culturais, representantes políticos concellos galegos e cámaras municipais, persoal técnico municipal, comunidades de montes e EURES, na súa participación dentro da mesa sectorial ‘Cultura e Comercio Tradicional’ que se celebrou a pasada semana na sede da Agrupación Europea de Cooperación Terrritorial Rio Minho, en Valença.

Neste encontro, cuxo obxectivo era recoller ideas sobre como potenciar a cultura e o comercio na zona transfronteiriza do río, estiveron tamén os relatores Carmen Villarino, profesora de filoloxía galega e portuguesa da Universidade de Santiago de Compostela, e José Alberto Rio Fernandes, presidente da Asociación Portuguesa de Xeógrafos e Catedrático da Universidade de Porto, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia de Cooperación do Río Miño Transfronteirizo 2030’.

En xeral, os participantes na mesa coincidiron en que a día de hoxe a comunidade non ten sentimento de pertenza ao territorio transfronteirizo debido a que este se eliminou da historia común xa dende a escola.  Púxose de manifesto tamén a existencia de trabas burocráticas para contratacións culturais no país veciño, así como  o traballo de voluntariado non remunerado e poucos fondos que desenvolven os colectivos de ambas beiras.

Ante isto,os representantes das asociacións solicitaron a posta en marcha dun circuíto cultural da eurorrexión promovido dende as institucións, que sexa integrante coas entidades locais, e que dispoña dunha maior promoción e comunicación.

Por outra parte, as persoas participantes cualificaron de moi interesante a posibilidade de poñer en marcha unha feira ou evento cultural, un ‘Culturgal’ propio a nivel eurorrexional, onde de xeito anual se reúnan os diferentes actores das industrias culturais da zona e o público xeral nun modelo similar ao que se celebra anualmente na cidade de Pontevedra, con casetas para os promotores participantes, conferencias, presentacións, mesas redondas ou concertos para dar a coñecer as últimas novidades en música, libros, teatro ou cinema galego e portugués, neste caso.

Museo da rexión

Antes do debate conxunto sobre cultura foi a quenda das exposicións dos expertos. A relatora Carmen Villarino destacou a importancia da cultura como elemento diferenciador dun grupo social  e a importancia da identidade cultural. Sinalou que a cultura é unha cuestión transversal, unha ferramenta para a “organización da vida” que aporta un sentimento/orgullo de pertenza a unha única comunidade no territorio. Neste sentido, e dentro do ámbito do territorio transfronteirizo, subliñou que é preciso recuperar e actualizar a historia común e identidade da contorna do Miño.

Para este obxectivo plantexou a posibilidade de crear unha base datos comúns (asociacións, actividades…), mapas de elementos culturais e ferramentas interactivas, así como incluso un posible Museo da rexión ou, de xeito menos ambicioso, exposicións itinerantes con fondos arquivísticos bibliotecarios. Tamén propuxo a denominación de rúas con nomes de persoas galegas ilustres en Portugal e viceversa, aproveitar os instrumentos legais dos que se dispón, e sobre todo, non deixar nunca de lado á poboación local, é quen sustenta a cuestión identitaria.

O comercio, esencia das vilas

Pola súa banda, o relator Rio Fernandes centrou a súa charla na potenciación do comercio tradicional, e subliñou a necesidade de substituír o comercio anónimo das aforas e centros comercias polo comercio do centro das vilas, máis próximo á xente e que aporta calidade de vida. O catedrático lembrou que o comercio ten un papel económico fundamental que non pode ser esquecido, así como unha dimensión social e urbana, posto que é indispensable na constitución das vilas e cidades. Destacou o exemplo da peonalización das rúas de Pontevedra, que definiu como un grande éxito aínda que había unha reticencia inicial porque se consideraba que sería un problema que os coches non puideran chegar ao centro das vilas, cuestión esta última que se demostrou totalmente errónea.

Rio apostou pola cooperación entre comerciantes, e por fomentar a proactividade das institucións con respecto ao comercio. Tamén destacou como interesante facer unha carta de ordenamento comercial, organizar “noites brancas” (establecementos abertos pola noite) en toda a rexión ou por municipios, ou identificar establecementos comerciais singulares (antigos, de mobiliario…).

Mesa sectorial sobre mobilidade

Logo da celebración das dúas primeiras mesas sectoriais, este mércores 3 de outubre terá lugar a próxima, que versará sobre ‘Mobilidade, servizos e turismo sustentable’. Desenvolverase na sede da AECT en Valença ás 17 horas (hora galega)  e contará coa participación de Valerià Paül Carril, Director da Fundación CEER  (Centro de Estudios Eurorrexionais), profesor da Universidade de Compostela, xeógrafo e doutor en Planificación Territorial e Desevolvemento Rexional; e de  Xavier Martínez Cobas, profesor de Economía Financeira e Contabilidade da Universidade de Vigo, que forman parte do equipo científico da Fundación CEER para a elaboración da ‘Estratexia 2030’.

As persoas interesadas en participar nesta mesa sectorial poderán inscribirse a través da páxina web www.smartminho.eu/participa.  Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

A Estratexia de Cooperación Intelixente do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




Axentes sociais do territorio do Miño ven necesario un convenio transfronteirizo de emerxencias e máis coordinación na loita contra o lume

Éxito de participación cidadá na primeira mesa sectorial celebrada este luns no marco da ‘Estratexia de Cooperación 2030’

 

Axentes sociais do territorio do Miño ven necesario que as administracións galega e portuguesa asinen un convenio transfronteirizo de emerxencias e aumenten a súa coordinación na loita contra o lume. Así o manifestaron representantes de entidades económicas, sociais e culturais, e persoal técnico e político de ambas marxes do río durante a celebración da primeira mesa sectorial de participación para elaborar a ‘Estratexia de Cooperación do Río Miño Transfronteirizo 2030’, un documento que servirá de guía para desenvolver o territorio.

A primeira mesa de traballoda Estratexia -titulada ‘A gobernanza no territorio transfronteirizo’- desenvolveuse este luns no edificio Área Panorámica de Tui e contou con máis participación da prevista pola organización, que definiu a convocatoria como “un éxito”. O encontro foi a primeira xuntanza interactiva na que os axentes socioeconómicos da zona puideron expresar as súas inquedanzas e propostas sobre o futuro da contorna do Miño. Sobre a mesa púxose o debate do papel que deben xogar as diferentes administracións e incluso a AECT Rio Minho nos problemas da poboación transfronteiriza.

No caso das emerxencias, os asistentes consideraron prioritario ter unha maior coordinación entre a parte galega e lusa, poñendo como exemplo o caso do paracaidista que tiña que ser rescatado ao ter problemas cando sobrevoaba o territorio transfronteirizo: en terra non saía ningún equipo de rescate de ningunha de ambas marxes porque os mandos consideraban que a emerxencia non entraba dentro das súas competencias nin ámbito de actuación.

Por outra banda, tamén se tratou a importancia de dispor dunha acción coordinada e conxunta no ámbito da loita contra o lume, unha política forestal global que aborde tanto medios e equipamentos de extinción como liñas para a prevención. No debate lembráronse os lumes do pasado ano, cando as lapas sobrepasaron o río Miño dende a parte portuguesa chegando cunha grande virulencia á provincia.

‘Know-how’ transfronteirizo

A mesa sectorial iniciouse coa presentación realizada pola  profesora de Relacións Internacionais e Administración Pública de Universidade do Minho, Sandrina Antunes, quen destacou a importancia de reforzar a Agrupación de Cooperación Territorial Rio Minho (AECT-Rio Minho), a través dunha coordinación eficaz coas entidades públicas e privadas, así como dun proceso participativo continuado coa cidadanía. Así mesmo, insistiu na conveniencia de  tirar partido do ‘know-how’ xa existente en materia de cooperación transfronteiriza e na procura de novas oportunidades de financiamento que permitan que se consolide como unha estrutura xurídica autosostible.

A continuación foi a quenda dos asistentes  á mesa, que fixeron fincapé na necesidade da creación dunha cidadanía compartida que se traduza en servizos comúns. Moitas das persoas participantes expuxeron o anhelo de que a AECT actúe como interlocutor entre as autoridades locais e os gobernos estatais e rexionais en materia de cooperación transfronteiriza, así como para representar os intereses do territorio en Bruxelas.

Durante as intervencións participaron tamén representantes da AECT Galiza-Norte de Portugal, resaltando a importancia dunha colaboración fluída entre ambas AECT para unir esforzos e identificar obxectivos comúns. Pola súa banda, representantes asociativos manifestaron tamén o seu interese en incrementar a colaboración coa AECT Rio Minhoe con outros colectivos da zona para potenciar a cooperación.

A seguinte mesa sectorial, sobre ‘Cultura e comercio tradicional’, terá lugar este xoves 27 de setembro ás 17 horas (hora galega)  na sede da AECT en Valença. Contará coa participación de Carmen Villarino, profesora de filoloxía galega e portuguesa da Universidade de Santiago de Compostela, e de José Alberto Rio Fernandes, presidente da Asociación Portuguesa de Xeógrafos e Catedrático da Universidade de Porto, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia 2030’.

As persoas interesadas en participar nestamesa sectorial poderán inscribirse a través da páxina web www.smartminho.eu/participa. Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

A Estratexia de Cooperación Intelixente do rio MinhoTransfronteirizo enmárcase dentro do proxecto SmartMinho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




Primeira xornada de participación pública para elaborar a ‘Estratexia 2030’ coa que desenvolver o territorio do Miño

A AECT fai un chamamento aos axentes económicos e sociais da zona para que asistan este luns á mesa sectorial sobre ‘Gobernanza no territorio transfronteirizo’

A nova fase de participación para elaborar a ‘Estratexia de Cooperación do Río Miño Transfronteirizo 2030’ arranca este luns 24 de setembro en Tui coa celebración da primeira mesa sectorial titulada “A gobernanza no territorio transfronteirizo”.  Trátase do primeiro encontro interactivo coa poboación para elaborar de maneira consensuada un documento guía sobre como desenvolver as potencialidades do territorio: a intención é acadar unha boa participación dos axentes socioeconómicos da zona para que expresen as súas propostas, inquedanzas e visión sobre cal debe ser o futuro do territorio do Miño.

A mesa sectorial terá lugar no edificio Área Panorámica ás cinco da tarde e nela tomarán parte a profesora de Relacións internacionais e Administración Pública de Universidade do Minho, Sandrina Antunes, e o profesor de Economía Financieira e Contabilidade da Universidade de Vigo, Xavier Martínez Cobas, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia 2030’.

As persoas interesadas en participar na mesa sectorial poderán inscribirse a través da páxina web www.smartminho.eu/participa. Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

As seguintes mesas sectoriais que se celebrarán abordarán a ‘Cultura e comercio tradicional’, o 27 de setembro en Valença; ‘Mobilidade, os servizos e os turismo sustentable’, o 3 de outubro tamén en Valença; e ‘Sectores produtivos’, o 8 de outubro en Tui . Todas elas serán ás cinco da tarde (hora galega).

Detrás da Estratexia de Cooperación Intelixente do Río Miño Transfronteirizo, coñecida como ‘Estratexia 2030’, está un programa de actuación conxunta dos actores públicos e privados do territorio do río Miño na área do norte de Portugal e sur da provincia de Pontevedra. Este traballo de análise profunda do espazo transfronteirizo ten como horizonte futuro o novo marco financeiro europeo 2023-2027 e rematará a finais de ano coa celebración do II Fórum do Río Miño Transfronteirizo.

‘A Estratexia 2030’ pretende desenvolver un plan de acción e implementar un proceso capaz de involucrar aos actores públicos e privados (axentes económicos e sociais presentes no territorio) co fin de ser un documento-guía da orientación das políticas públicas de desenvolvemento da área transfronteiriza do río Miño, orientado e integrado nunha perspectiva de valoración e uso económico e sustentable dos recursos do río internacional.

A encargada de impulsar a Estratexia é Agrupación de Cooperación Territorial Río Miño (AECT-Río Miño),  constituída pola Deputación de Pontevedra no territorio do Miño pontevedrés, e pola Comunidade Intermunicipal do Alto Minho portugués (CIM Alto Minho).

A Estratexia de Cooperación Intelixente do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




A elaboración da ‘Estratexia 2030’ do río Miño Transfronteirizo entra nunha nova fase de participación social

Tras o importante éxito de asistencia ao I Fórum do Río Miño Transfronteirizo, que se celebrou en Valença o pasado mes de xuño, a elaboración da ‘Estratexia 2030’ entra agora nunha nova fase de participación cidadá. Os axentes sociais do territorio interesados poderán seguir colaborando coa creación do documento estratéxico, ben a través da web www.smartminho.eu, onde se habilitou espazo virtual para este propósito, ou ben sumándose á celebración das novas mesas sectoriais que terán lugar nos próximos meses. As opinións e propostas, tanto individuais como de colectivos e institucións, serán recollidas pola equipa científica para a redacción do documento Diagnóstico e Plan De Acción da Estratexia de Cooperación Intelixente do Río Miño Transfronteirizo, que será presentada no II FORUM, a finais de ano.

O documento preliminar, que foi sometido a debate no I Fórum, xunto coas conclusións recollidas nas distintas mesas sectoriais que se celebraron o pasado 21 de xuño, estará dispoñible na páxina web ao longo das próximas semanas, onde xa hai habilitado un espazo virtual transfronteirizo de participación cidadá, a través do cal as persoas interesadas poderán facer chegar ás súas aportacións en forma de propostas e opinións, utilizando as diferentes caixas de correo habilitadas. 

Así mesmo, a partir de finais de xullo e ata finais de outubro, tamén estará activo neste espazo web, un bloque de consulta cidadá sobre diferentes aspectos e medidas relacionados coa cooperación entre ambas beiras do río Miño.

Pola súa banda, durante os meses de setembro e outubro convocaranse novas mesas sectoriais ao redor de catro eixos: os sectores produtivos; a gobernanza no territorio transfronteirizo; a mobilidade, os servizos e o turismo sustentable; e a cultura e comercio tradicional”. Para inscribirse nelas bastará con cubrir un formulario a través de www.smartminho.eu ou ben enviar un correo electrónico a riominho.interrreg@depo.es.

Detrás da denominación Estratexia De Cooperación Intelixente do Rio Minho Transfronteirizo, ‘Estratexia 2030’, atopamos un programa de actuación conxunta dos actores públicos e privados do territorio do río Miño na área do norte de Portugal e sur da provincia de Pontevedra. Este traballo de análise profunda do espazo transfronteirizo ten como horizonte futuro o novo marco financeiro europeo 2023-2027.

A ‘Estratexia 2030’ desenvolve un plan de acción e implementa un proceso capaz de involucrar aos actores públicos e privados (axentes económicos e sociais presentes no territorio) e será un documento-guía da orientación das políticas públicas de desenvolvemento da área transfronteiriza do río Miño, orientado e integrado nunha perspectiva de valoración e uso económico e sustentable dos recursos do río internacional.

A encargada de impulsar a Estratexia sería a Agrupación de Cooperación Territorial Río Miño (AECT-Río Miño),  constituída pola Deputación de Pontevedra no territorio do Miño pontevedrés, e pola Comunidade Intermunicipal do Alto Minho portugués (CIM Alto Minho).

A Estratexia de Cooperación Intelixente do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




I FÓRUM DO RÍO MIÑO TRANSFRONTEIRIZO

Valença, 21 de xuño de 2018

Escola Superior de Ciências Empresariais-IPVC

 

Organizan: Comunidade Intermunicipal do Alto Minho, Deputación de Pontevedra e Fundación Centro de Estudos Eurorrexionais

Actividade encadrada no proxecto SMART MINHO-ESTRATEXIA DE COOPERACIÓN INTELIXENTE DO RÍO MIÑO TRANSFRONTEIRIZO, cofinanciado nun 75 % polo FEDER a través do POCTEP 2014-2020.

 

 

PROGRAMA

 

9:00 h    Recepción de participantes, recollida de credenciais e documentación

 

9:30 h    Inauguración e mesa de autoridades: “O futuro estratéxico do territorio do río Miño transfronteirizo”

Participantes:

– Jorge Mendes, presidente da Câmara Municipal de Valença

– Presidencia da Fundación Centro de Estudos Eurorrexionais

– M.ª del Carmen Silva Rego, presidenta da Deputación de Pontevedra

– José Maria Costa, presidente da Comunidade Intermunicipal do Alto Minho

 

10:00 h  Panel I. As bases da estratexia de cooperación do río Miño

Moderador: Uxío Benítez Fernández, deputado de Cooperación Transfronteiriza e director da AECT Río Miño

“Análise territorial da incidencia dos proxectos Interreg no período 2007-2013 na Eurorrexión Galiza-Norte de Portugal”

Relator: Valerià Paül, director da FCEER

“Presentación do documento de base da estratexia”

Relator: Manuel Rodríguez, investigador da FCEER

 

10:45 h  Pausa para o café

 

11:15 h  Panel II. Mesas temáticas de debate sobre os principais eixes estratéxicos e obxectivos

                  · Mesa núm. 1: “Os sectores produtivos”

Relator: Francisco Carballo Cruz (Universidade do Minho) e Xavier Martínez Cobas (Universidade de Vigo)

                   · Mesa núm. 2: “A gobernanza no territorio transfronteirizo”

Relatora: Sandrina Antunes (Universidade do Minho)

                  · Mesa núm. 3: “A mobilidade, os servizos e o turismo sustentable”

Relator: Rubén C. Lois (Universidade de Santiago de Compostela)

                   · Mesa núm. 4: “Cultura e comercio tradicional”

Relator: José Rio Fernandes (Universidade do Porto)

 

12:45 h  Exposición das conclusións provisionais por parte dos relatores do equipo científico

Moderador: Fernando Brito Nogueira, presidente da Câmara de Vila Nova de Cerveira e vicedirector da AECT Río Miño

 

13:15 h  Clausura

Representante da Presidencia da Xunta de Galicia*
Representante da Presidencia da CCDR-N*

(*a confirmar)

 

13:30 h  Brunch/Networking

 




Uxío Benítez, elixido director da nova Agrupación Europea de Cooperación Territorial Rio Minho

Uxío Benítez, elixido director da nova Agrupación Europea de Cooperación Territorial Rio Minho

A Agrupación Europea de Cooperación Territorial (AECT) Rio Minho vén de iniciar a constitución formal dos seus órganos co nomeamento do seu primeiro director: o deputado de Cooperación Transfronteiriza, Uxío Benítez. O mandato do nacionalista á fronte da nova entidade de cooperación durará dous anos e no 2020 pasará ao rexedor da Câmara Municipal de Vila Nova de Cerveira, Fernando Nogueira.

Uxío Benítez subliñou que “o reto durante estes dous anos de mandato será consolidar a AECT nun instrumento de política transfronteiriza no territorio do Miño”. Así mesmo, asegurou que a entidade “estará ao servizo da cidadanía e de todos os concellos e cámaras municipais que a conforman”. O responsable provincial quixo lembrar unha vez máis a relevancia do nacemento desta nova entidade e da “importancia desta área de actuación”, encadrada no medio do eixo Vigo-Porto (con 3,5 millóns de habitantes) e na que se desenvolven practicamente a metade dos fluxos de vehículos lixeiros entre España e Portugal.

Segundo establecen os estatutos da nova AECT, a dirección terá sempre carácter rotatorio bianual e alternarase entre os dous socios que a conforman: a Deputación de Pontevedra e a CIM Alto Minho. Deste xeito, durante os dous primeiros anos o cargo de vicedirector recaerá nun representante portugués e despois pasará a un representante da Deputación de Pontevedra. Ademais da dirección, o novo organismo tamén conta xa cun Consello de Coordinación composto pola deputada Monste Magallanes e o presidente da Cámara Municipal dos Arcos de Valdevez, ambos en calidade de vogais da institución.

A constitución da Asamblea Xeral, en maio

Segundo adiantou o deputado de Cooperación Transfronteiriza Uxío Benítez, o seguinte paso dentro do proceso de formalización da AECT será a constitución da Asemblea Xeral, prevista para o vindeiro mes de maio, e na que previsiblemente estarán representadas as cámaras municipais e concellos do territorio do Miño.

A AECT Río Minho é un novo instrumento estable de desenvolvemento con personalidade xurídica propia que ten por obxectivo a defensa da xestión compartida dos servizos entre todos os actores existentes en torno ao río Miño. Así mesmo, a entidade ten capacidade para optar a fondos europeos e xestionalos, así como promover e organizar accións de cooperación no territorio de forma directa.

Os dous socios principais da AECT son a Deputación de Pontevedra e a CIM Alto Minho, que aglutinan 16 concellos pontevedreses (A Guarda, O Rosal, Oia, Tomiño, Tui, O Porriño, Salceda de Caselas, Salvaterra de Miño, Ponteareas, As Neves, Mondariz, Mondariz-Balneario, Arbo, Crecente, A Cañiza e Covelo) e outros dez do norte de Portugal, abranguendo máis de tres mil quilómetros cadrados de territorio e 375.995 habitantes.

O impulso para a creación da AECT Rio Minho encádrase dentro das accións de Estratexia de Cooperación Intelixente Transfronteiriza do proxecto Smart Minho liderado pola Deputación de Pontevedra, que acadou un investimento de 942.022,47 euros, dos que o 75% están cofinanciados polo programa INTERREG VA POCTEP dentro dos fondos FEDER da Unión Europea.