O Miño é unha fronteira natural que, lonxe de separar, une. A fronteira máis poboada entre España e Portugal, con preto de 376.000 habitantes, serve de nexo de unión para unha rexión de gran valor turístico, patrimonial e ambiental e cun valor cultural e lingüístico común.
O territorio transfronteirizo formado polos 16 concellos do sur de Pontevedra e 10 cámaras do norte de Portugal dispón desde este sábado 24 de febreiro dunha nova ferramenta xurídica para optar e xestionar fondos europeos: a Agrupación Europea de Cooperación Territorial (AECT) Río Minho. A presidenta da Deputación de Pontevedra Carmela Silva e o presidente da CIM Alto Minho José María Costa asinaron ante notario o convenio de colaboración e os estatutos da nova entidade pública nun acto no que estiveron presentes o secretario xeral de Coordinación Territorial do Ministerio de Presidencia do Goberno do Estado, Juan Ignacio Romero; o director xeral de Relacións Exteriores e coa Unión Europea da Xunta de Galicia, Jesús Gamallo; a vicepresidenta da CCDR-N Ester Gomes e o deputado de Cooperación Transfronteiriza da Deputación, Uxío Benítez, como impulsor da nova agrupación.
Todos os presentes na cerimonia pública de constitución da AECT coincidiron en sinalar que era un día “histórico” para o territorio da fronteira do Miño, xa que a agrupación permitirá desenvolver socioeconomicamente a zona e mellorar as condicións de vida da súa cidadanía. A presidenta Carmela Silva salientou que a creación da nova agrupación de cooperación europea é un instrumento para “dar resposta aos retos do século XXI que obrigan a rachar coas fronteiras e a unir persoas e os seus intereses políticos, sociais, económicos e de desenvolvemento”. Silva destacou que o espazo que abrangue a AECT é “extraordinario” e que agora toca convertelo “nun espazo do que a xente estea orgullosa facendo que sexa un espazo de referencia”.
Día histórico para os concellos transfronteirizos de Pontevedra e do norte de Portugal co nacemento da nova AECT Rio Minho
Pola súa parte, o deputado de Cooperación Transfronteiriza Uxío Benítez insistiu en que foi un día especial “para os que levamos o río Miño no corazón, porque ten que volver a ser o centro do que nos une”. Destacou que o territorio da fronteira “ten que acreditar en si mesmo porque é o centro dunha área cunha forte dinamización económica”, lembrando que está no medio do eixo Vigo-Porto (con 3,5 millóns de habitantes) e reúne o 47 % dos fluxos de vehículos lixeiros entre España e Portugal.
O impulsor da AECT destacou que 350 anos despois do tratado de Lisboa (de 1668) que finalizou coa guerra entre España e Portugal marcando a paz e as fronteiras “nace un instrumento para derrubalas, un instrumento xurídico estable que impulsará o desenvolvemento do territorio e estará ao servizo da cooperación urbana, dará poder de decisión aos territorios e permitirá acceso aos fondos europeos”, indicou, lembrando que en breve se abrirá unha nova convocatoria do POCTEP.
Por último, Benítez quixo lembrar que un dos obxectivos principais da AECT será crear unha marca transfronteiriza para o río Miño que sexa máis competitiva e teña recoñecemento internacional. “Nun mundo global non podemos xestionar o turismo dende un só concello”, afirmou.
Pola súa banda, o director xeral de Relacións Exteriores, Jesús Gamallo, quixo transmitir ás persoas asistentes ao acto de constitución da AECT “o compromiso da Xunta e do presidente Feijóo” e o seu agradecemento pola constitución da nova agrupación, “xa que para nós é moi importante aumentar as estruturas que fagan na práctica a cooperación transfronteiriza”.
Gamallo salientou que a Xunta ten “un plan” de cooperación baseado en tres eixos. O primeiro, as infraestruturas, apostando polo corredor Atlántico e o tren Vigo-Porto, do que dixo, “agardamos que en 2019 poidamos unir ambas cidades en hora e media” para estruturar o territorio e potenciar os usos turísticos. O director xeral tamén destacou “a aposta pola innovación e o traballo pola demografía e o envellecemento activo co apoio dos fondos europeos”.
Finalmente, o secretario xeral de Coordinación Territorial do Ministerio de Presidencia, Juan Ignacio Romero, lembrou que o seu departamento foi o que autorizou a nova AECT e destacou o seu agradecemento por poder coñecer de primeira man desde o “Goberno de España” o traballo de cooperación que existe no territorio do Miño. “A nova AECT é un reto, posto que está nun ámbito territorial que, cos meus anos de experiencia en cooperación, nunca tiña visto tanto polo volume de poboación como pola transcendencia do territorio. Todos debemos traballar nesta mesma liña de cooperación, e por iso os meus mellores desexos aos fundadores”, finalizou.
Pola parte portuguesa, salientaron tamén os beneficios futuros da AECT o presidente da CIM Alto Minho, o presidente de Uniminho, e a vicepresidenta da CCDR-N, Ester Gomes, quen ao igual que Carmela Silva se parabenizou por que fose unha muller, tamén, a que pechase as intervencións dun día histórico para o territorio do Miño.
Unha vez que este sábado se asinou oficialmente o nacemento da Agrupación Europea do territorio do Miño coa sinatura do convenio e os seus estatutos polos seus dous principais socios (Deputación de Pontevedra e CIM Alto Minho) reunirase a asemblea xeral da AECT o próximo mes para elixir presidente.
Cando xa se coñeza o nome do máximo dirixente concretaranse as vindeiras accións e proxectos, así como o traballo a realizar para acadar novos fondos europeos, xa que a vindeira convocatoria do POCTEP está próxima.
Hai que lembrar que os dous socios principais da AECT son a Deputación de Pontevedra e a CIM Alto Minho, entes baixo os que se reúnen 16 concellos pontevedreses (A Guarda, O Rosal, Oia, Tomiño, Tui, O Porriño, Salceda de Caselas, Salvaterra de Miño, Ponteareas, As Neves, Mondariz, Mondariz Balneario, Arbo, Crecente, A Cañiza e Covelo) e outros dez do norte de Portugal.
Para ver máis fotos premer aquí.
A nova Agrupación Europea de Cooperación Territorial (AECT) Río Minho, que reúne á Deputación de Pontevedra e aos 16 concellos do Baixo Miño e Condado-Paradanta xunto coa CIM Alto Minho e dez câmaras do Norte de Portugal, acaba de obter a autorización que faltaba para o seu nacemento oficial. Este novo organismo servirá de ferramenta para a cohesión económica, social e territorial do contorno do Río Miño e, de xeito particular, para solicitar fondos europeos para proxectos conxuntos.
O deputado Uxío Benítez, impulsor da nova asociación, explicou que a CIM Alto Minho acaba de recibir o visto bo do Secretario de Estado do Desenvolvimento e Coesão da República Portuguesa para participar no proxecto, o que dá vía libre á súa constitución formal, xa que a autorización do Ministerio de Presidencia e para as Adminsitracións Territoriais pola parte española chegou á Deputación o pasado ano. A futuro, o paso que resta para formalizar a AECT de xeito definitiva será inminente, xa que no vindeiro mes de febreiro se celebrará a sinatura do acordo entre Deputación e CIM Alto Minho (os dous socios principais) e asinaranse os estatutos ante notario.
Segundo explicou Benítez, a aprobación da AECT por parte de Portugal supón un paso adiante agardado dende hai meses. Subliñou a súa satisfacción e asegurou que existe un interese real para poñer en marcha de xeito inmediato o novo organismo de cooperación galego-portugués logo de ter feito durante os últimos anos “un traballo de consenso que frutificará na AECT e que permitirá dinamizar todo o territorio do Miño e ‘borrar’ a fronteira”.
Os concellos de Pontevedra están a apostar dende hai tempo por aproveitar sinerxias comúns co Norte de Portugal, e a nova AECT Río Miño permitirá traballar de xeito conxunto con máis facilidade: será unha entidade con personalidade xurídica que permitirá optar e xestionar fondos europeos de xeito máis áxil que ata o de agora, promover e organizar accións de cooperación do territorio de forma directa, así como servir de foro estable sobre o río Miño, no que a día de hoxe están implicadas moitas administracións.
A nova AECT estará formada por unha asemblea e un órgano executivo. A dirección será un organismo unipersoal que ocuparán representantes de Pontevedra e Portugal rotatorio cada dous anos, ao igual que ocorrerá coa vicedirección. Tamén haberá un Consello Coordinador, formado por membros das dúas partes, que será o encargado da asesorar á dirección e da xestión do día a día. Finalmente, haberá un Consello Consultivo aberto no que se organizarán foros específicos nos que poderán participar expertos en diferentes materias segundo as necesidades, así como outros representantes do veciños e veciñas da zona.
Os dous socios principais da AECT serán a Deputación de Pontevedra e a CIM Alto Minho, entes baixo os que se reúnen 16 concellos pontevedreses (A Guarda, O Rosal, Oia, Tomiño, Tui, O Porriño, Salceda de Caselas, Salvaterra, Ponteareas, As Neves, Mondariz, Mondariz Balneario, Arbo, Crecente, A Cañiza e Covelo) e outros dez do Norte de Portugal. En total abránguense 3.312 quilómetros cadrados de territorio e 375.995 habitantes.
O grupo de traballo da Agrupación de Cooperación Territorial Río Miño (AECT) reuniuse este mércores na sede da CIM Alto Minho e futura sede da AECT en Valença para supervisar os proxectos que se están levando a cabo ao acubillo do Miño transfronteirizo e ter unha visión global da situación na que se atopan cada un destes proxectos, tanto o Smart Minho como o Visit Miño, ambos os dous promovidos pola Deputación de Pontevedra en colaboración coa Comunidade Intermunicipal do Alto Minho.
Nesta reunión de traballo estiveron presentes o secretario executivo intermunicipal da CIM Alto Minho, Júlio Pereira; o responsable de Cooperación Transfronteiriza da Deputación de Pontevedra, Uxío Benítez; os presidentes das cámaras municipais de Vila Nova de Cerveira e Melgaço, Fernando Nogueira e Manoel Batista Calçada, respectivamente; así como técnicos e asesores de ambos os dous organismos promotores dos proxectos.
Durante a reunión, Xabier Martínez Cobas, membro do equipo científico que elabora a axenda estratéxica, explicou a todos os presentes como está a desenvolverse a posta en marcha da Estratexia de Cooperación Intelixente do Río Minho Transfronteirizo.
Ademais de valorar a posta en marcha da estratexia e falar de prazos, durante a xuntanza este grupo de traballo estableceu principios de abril para o lanzamento do I Foro Transfronteirizo e falaron da segunda convocatoria INTERREG VA, que estará aberta a finais de febreiro.
Máis fotos premendo aquí.
A primeira rolda de xuntanzas de traballo entre municipios fronteirizos para abordar o proxecto Smart Minho dun xeito integral chega ao seu fin. E faino coa participación do presidente da cámara municipal de Melgaço, Manoel Batista Calçada, e o alcalde de Arbo, Horacio Gil, nunha xuntanza con representantes dos promotores da iniciativa, a Deputación de Pontevedra e a CIM Alto Minho.
A principios de decembro comezaban as primeiras reunións de traballo da Estratexia do Río Miño Transfronteirizo, cinco xuntanzas entre o equipo técnico redactor e os alcaldes dos distintos municipios galegos e portugueses integrantes do proxecto para discutir os aspectos máis sobranceiros da cooperación entre vilas limítrofes e as estratexias conxuntas que deben artellarse co fin de que a cooperación se converta nun motor de desenvolvemento do territorio do Miño fronteirizo.
Con esta primeira rolda rematada espérase poder realizar no primeiro trimestre do ano o I Foro Transfronteirizo do Río Miño, onde o equipo técnico formado por científicos de cinco das seis universidades da Eurorrexión (Vigo, Porto, Santiago de Compostela, Minho e A Coruña) coordenados pola Fundación Centro de Estudos Eurorrexionais (CEER) presentará a análise-diagnose sobre este territorio.
Será a primeira vez que o territorio galego e portugués separado e unido á vez polo Miño conte cun estudo en profundidade das súas fortalezas, debilidades e complementariedades con vistas ao deseño dun desenvolvemento estratéxico que permita por en valor os seus recursos comúns a través da cooperación transfronteiriza.
A Estratexia de Cooperación Intelixente do Río Miño Transfronteirizo pretende ser o programa de actuación da cooperación transfronteiriza para as vindeiras décadas, orientada cara un novo marco financeiro europeo post 2020 impulsado pola Deputación de Pontevedra e pola Comunidade Intermunicipal do Alto Minho a través da futura Agrupación de Cooperación Territorial (AECT) Río Miño, en vías de constitución.
Máis fotos premendo aquí.
A elaboración da Estratexia de Cooperación Intelixente para o Río Miño Transfronteirizo está xa en marcha. Este xoves finalizarán as primeiras xuntanzas de traballo entre a equipa técnica redactora e os alcaldes dos concellos galegos e portugueses do Miño que participan no programa europeo e, ademais, xa está previsto que no primeiro trimestre de 2018 se celebre o Primeiro Foro Transfronteirizo con científicos das seis universidades da Eurorrexión para presentar unha análise-diagnose sobre as necesidades e potencialidades do territorio.
As xuntanzas entre municipios veciños da ‘raia’ (Tomiño-Cerveira, Tui-Valença, As Neves-Salvaterra-Monçao, A Guarda-O Rosal-Caminha e Arbo-Crecente-Melgaço) comezaron a principios deste mes. Celebráronse cinco encontros aos que acudiron os máximos responsables municipais para discutir os aspectos máis sobranceiros da cooperación entre vilas limítrofes e as estratexias conxuntas que deben articularse co fin de que a cooperación se converta nun motor de desenvolvemento do territorio do Miño Transfronteirizo. Só queda un encontro por realizar, que será o deste xoves en Melgaço entre representantes desta cámara portuguesa e dos municipios de Arbo e Crecente.
Por outra banda, no primeiro trimestre do ano entrante realizarase o Primeiro Foro Transfronterizo do Río Miño, onde a equipa técnica, formada por científicos cinco das seis das universidades da Eurorexión (Vigo, Porto, Santiago de Compostela, Minho e A Coruña) coordenados polo Centro de Estudos Eurorexionais (CEER) presentará a análise-diagnóstico sobre o territorio do Miño Transfronterizo.
Unha vez se finalice a Estratexia de Cooperación Intelixente para o Miño será a primeira vez que este territorio conxunto galego e portugués conte cun estudo en profundidade das súas fortalezas, debilidades e complementariedades con vistas ao deseño de desenvolvemento estratéxico que permita poñer en valor os seus recursos comúns a través da cooperación transfronteiriza.
A Estratexia de Cooperación Intelixente pretende ser un programa de actuación para as vindeiras décadas orientada cara un novo marco financeiro europeo ‘post-2020’ impulsada pola Deputación de Pontevedra no territorio do Miño pontevedrés e pola Comunidade Intermunicipal do Alto Minho portugués (CIM Alto Minho) a través da Agrupación de Cooperación Territorial Río Miño (AECT) que está en proceso de constitución.
Ambas iniciativas, a creación da AECT e da Estratexia, foron acordadas pola Deputación e a CIM Alto o pasado na Declaración de Tui, onde se acordou un marco de colaboración permanente entre ambas entidades locais de Galiza e Portugal para a fronteira común definida polo Río Miño. As iniciativas de cooperación gozan dun 75% de financiamento dos fondos europeos do INTERREG V-A / POCTEP.
A Estratexia do Río Miño Transfronteirizo pretende ser un documento de orientación das políticas públicas de financiamento da área transfronteiriza orientado e integrado nunha perspectiva de valoración e uso económico e sustentable dos recursos do río internacional. Trátase dun instrumento para apoiar a preparación de solicitudes candidatas a financiamento para rexións fronteirizas e identifica proxectos ‘áncora’ de desenvolvemento do territorio, desenvolve un plan de acción e implementa un proceso capaz de involucrar a actores públicos e privados (axentes económicos e sociais presentes no territorio).
Cuarta xuntanza de traballo entre concellos limítrofes para afondar na cooperación transfronteiriza e sentar as bases da Estratexia de Cooperación Intelixente do Río Miño-Smart Minho. Representantes dos promotores do proxecto, Deputación de Pontevedra e CIM Alto Minho, reuníronse cos alcaldes de A Guarda, Antonio Lomba; do Rosal, Jesús María Fernández Portela; e de Caminha, Miguel Alves, para presentarlles a Estratexia do Minho Transfronteirizo e discutir as vantaxes da cooperación entre vilas limítrofes de países distintos.
Esta estratexia será un documento de orientación das políticas públicas de financiamento desta área transfronteiriza artellada nunha perspectiva de valoración do uso económico e sustentable dos recursos. Ademais, servirá de rede de apoio á preparación de solicitudes candidatas a instrumentos de financiamento para rexións transfronteirizas, así como para identificar os proxectos áncora de desenvolvemento do territorio e poñelos en marcha.
A Estratexia de Cooperación Intelixente irá artellada a través da Agrupación de Cooperación Territorial Río Miño, ambas iniciativas acordadas pola Deputación e o CIM Alto Minho na Declaración de Tui, onde se deseñaba un marco de colaboración permanente entre ambas entidades locais de Galicia e Portugal para a fronteira común definida polo río Miño. Contan cun orzamento financiado ao 75% polo INTERREG VA POCTEP, fondos FEDER da Unión Europea.
A derradeira reunión celebrarase o vindeiro 21 de decembro en Melgaço, onde ademais do presidente da cámara da vila, Manoel Batista Calçada, acudirán os alcaldes de Arbo, Horacio Gil, e de Crecente, Julio C. García-Luengo.
Máis fotos premendo aquí.
Continúan as xuntanzas de traballo nesta primeira rolda de contactos entre concellos limítrofes transfronteirizos. Nesta ocasión, o presidente da cámara municipal de Monçao, António José Fernandes Barbosa, e os alcaldes de Salvaterra de Miño e As Neves, Arturo Grandal e Xosé Manuel Rodríguez, reuníronse con representantes da Deputación de Pontevedra e do CIM Alto Minho e co equipo técnico da Estratexia de Cooperación Intelixente do Río Miño para seguir buscando aqueles aspectos máis destacados de cooperación transfronteiriza, aspectos que estas vilas levan desenvolvendo dende hai anos.
O obxectivo é que a cooperación transfronteiriza se converta nun motor de desenvolvemento para os concellos de ambos os dous lados do río Miño. Para acadalo, o Smart Minho servirá para crear unha estrutura que permita profundar a nivel organizacional e de eficiencia no profeso de cooperación transfronteiriza a través de experiencias conxuntas de xestión de servizos, consolidándose nunha estrutura formal e oficial preparada para traballar nos novos paradigmas de cooperación.
O primeiro paso será facer unha análise-diagnose da situación do territorio e crear a Agrupación Europea de Cooperación Territorial (AECT) Río Miño, que incluirá 16 concellos galegos (A Guarda, O Rosal, Oia, Tomiño, Tui, O Porriño, Salceda de Caselas, Salvaterra, Ponteareas, As Neves, Mondariz, Mondariz Balneario, Arbo, Crecente, A Cañiza e Covelo) e dez cámaras do Norte de Portugal (Melgaço, Monçao, Paredes de Coura, Valença do Minho, Vila Nova de Cerveira, Arcos de Valdevez, Caminha, Ponte da Barca, Ponte de Lima, e Viana do Castelo).
Máis fotos da reunión premendo aquí.
Segunda xuntanza entre municipios transfronteirizos limítrofes para seguir traballando nas bases da Estratexia de Cooperación Intelixente do Río Miño Transfronteirizo-Smart Minho. O presidente da cámara de Valença, Jorque Salgueiro Mendes, e o alcalde de Tui, Carlos Vázquez Padín, reuníronse na vila portuguesa con representantes do equipo redactor do proxecto e das entidades promotoras, Deputación de Pontevedra e CIM Alto Minho.
Tratouse dunha xuntanza técnica para revisar os aspectos máis sobranceiros da cooperación entre estas vilas limítrofes e as estratexias conxuntas que deben de artellarse para que a cooperación se converta nun motor de desenvolvemento do territorio nas dúas beiras do Miño transfronteirizo.
O Smart Minho ten como obxectivo principal mellorar a eficiencia da cooperación institucional na área transfronteiriza do río Miño a través da planificación estratéxica do territorio común, que parta das experiencias de cooperación locais e a realización de pilotos de xestión conxunta de equipamentos, actividades culturais e de transporte, que favorezan a mobilidade na fronteira.
Conta cun orzamento de máis de 942.000 euros, cofinanciado ao 75% polo programa INTERREG VA POCTEP, fondos FEDER da Unión Europea.
Máis fotos premendo aquí.
Arranca a rolda de reunións para presentar a Estratexia de Cooperación Intelixente do Río Miño Transfronteirizo-Smart Minho aos concellos implicados. Representantes da Deputación de Pontevedra e da Comunidade Intermunicipal do Alto Minho (CIM Alto Minho) reuníronse esta tarde coa alcaldesa de Tomiño, Sandra González, e co presidente da cámara municipal de Vila Nova de Cerveira, Fernando Nogueira, na que é a primeira xuntanza técnica de traballo para discutir os aspectos máis sobranceiros da cooperación entre vilas limítrofes e as estratexias conxuntas que deben de artellarse para que a cooperación se converta nun motor de desenvolvemento do territorio.
O obxectivo do Smart Minho é facer un estudo en profundidade do territorio que engloba ao sur da provincia de Pontevedra e ao norte de Portugal, descubrindo as súas fortalezas, debilidades e complementariedades con vistas a deseñar un desenvolvemento estratéxico conxunto que permita poñer en valor os seus recursos comúns a través da cooperación transfronteiriza.
A Estratexia de Cooperación Intelixente pretende ser un programa de actuación para as vindeiras décadas de cara a un novo marco financeiro, un instrumento para apoiar a preparación de solicitudes candidatas a financiamentos para rexións fronteirizas e identificar os proxectos áncora de desenvolvemento do territorio.
Toda esta estrutura será artellada e xestionada a través da Agrupación de Cooperación Territorial Río Miño (AECT), que está en pleno proceso de constitución.
Máis fotos premendo aquí.
Os proxectos Smart Miño, que pretende crear un instrumento de cooperación estable para os concellos da fronteira da provincia de Pontevedra e o norte de Portugal, e Visit Río Miño para potenciar o turismo no territorio transfronteirizo do Miño, veñen de recibir o seu “pistoletazo de saída”. A Deputación de Pontevedra xa aceptou oficialmente en pleno a subvención de tres millóns de euros para as dúas iniciativas, que están cofinanciadas polos fondos europeos do FEDER (ao 75%) dentro da primeira convocatoria de axudas do Programa de Cooperación Transfronteiriza España-Portugal (POCTEP) 2014-2020 INTERREG VA.
Este avance, que dará paso ao traballo de campo e á realización de actuacións concretas, foi anunciado nun acto celebrado en Tui coa participación da Deputación de Pontevedra, da CIM Alto Minho, representantes do CETMAR e dos concellos e das cámaras beneficiarios, entre outras autoridades.
O proxecto Smart Minho é unha proposta inmaterial que ten un orzamento total de 942.022,47 euros, o 75% procedente de fondos FEDER, e pretende unha cooperación intelixente entre ambas as dúas partes do Miño. Ao abeiro desta iniciativa deberase propoñer unha estratexia de actuación para o territorio que rodea o río, crear a nova Agrupación Europea de Cooperación Transfronteiriza (AECT) como ferramenta xurídica institucional para actuar, e demostrar a viabilidade do traballo en conxunto entre concellos pontevedreses e cámaras portuguesas a través de actuacións concretas de xeito ‘piloto’ no ámbito da cultura e da mobilidade, con proxectos sobre o patrimonio inmaterial en colaboración de Ponte nas Ondas, festivais de música transfronteirizos, foros culturais e a posta en funcionamento da liña compartida de transporte público entre o eixo Vigo-Tui-Valença, entre outros.
As institucións españolas e lusas coincidiron en esixir que os fondos europeos do POCTEP se destinen realmente ás zonas de fronteira e que é fundamental que na próxima estratexia do fondos europeos estea contemplado o desenvolvemento de territorios e poboacións de menos de 20.000 habitantes, sobre todo no territorio do Miño.