1

O II Fórum do Río Miño transfronteirizo celebrarase o 29 de novembro, en Tomiño

Dende finais de 2017, e como acción principal dentro do proxecto Smart Minho, púxose en marcha a elaboración da ‘Estratexia Río Miño Transfronteirizo 2030’, un documento guía que marcará as liñas de actuación da cooperación entre o sur da provincia de Pontevedra e o Norte de Portugal durante a próxima década. Para a creación da estratexia foi necesario realizar un estudo profundo do territorio, dende o punto de vista económico, social e político, no que participaron os principais actores galego portugueses de cada un destes sectores cun altísimo grao de implicación por parte de todos eles.

A celebración deste II Fórum do Río Miño Transfronteirizo, que se celebrará no Auditorio de Goián (Tomiño) o vindeiro 29 de novembro supón o cumio deste traballo innovador, xa que existían estudos similares pero non un cunha visión compartida do territorio, e no que a cidadanía tivo a oportunidade de participar, debater e achegar os seus puntos de vista ao documento que se ía elaborando, e polo tanto esta é unha estratexia feita dende a base.

Baixo a coordinación da AECT Río Miño, un equipo de expertos e expertas das 6 universidades públicas do norte de Portugal e Galiza lideraron este traballo, polo  que os resultados contan tamén cun aval académico e tanto a nivel institucional como social o resultado foi moi positivo”, segundo indicou o director da AECT Río Miño e deputado de Cooperación Transfronteiriza da Deputación de Pontevedra, Uxío Benítez. “Realizáronse ata 10 encontros bilaterais entre concellos galegos e cámaras municipais portuguesas e numerosas reunións de traballo no que participaron os diferentes gobernos locais”, engadiu.

Así mesmo, “a elaboración da ‘Estratexia Río Miño 2030’ partiu da premisa de ser un traballo realizado a través da participación cidadá”. Para iso puxéronse en marcha diferentes mecanismos como un “espazo de participación cidadá virtual a través da páxina web smartminho.eu, unha enquisa pública dirixida á toda a poboación do territorio, 5 mesas sectoriais centradas en diferentes temáticas como turismo, cultura, comercio ou mobilidade e a celebración do I Fórum do Río Miño Transfronteirizo, e aínda quedan pendentes dúas mesas sectoriais máis e por suposto, este segundo Fórum, conseguindo unha participación moi alta”, apuntou Benítez.

Pola súa parte, o alcalde de Vila Nova de Cerveira e vice director da AECT Río Miño, João Fernando Brito Nogueira, lembrou que “o I Fórum foi un éxito de participación pública, cun diagnóstico oportuno para a rexión transfronteiriza, polo que esta segunda edición vai permitir perfeccionar a estratexia, de forma que imos contar cun instrumento con orientación propia, pero tamén imos poder  presentar os nosos intereses e reivindicacións á Unión Europea”. Nogueira explicou que “a cooperación transfronteiriza está nos plans, polo menos teóricos, dos gobernos de Portugal e España e coa elaboración deste documento ‘Estratexia Río Miño 2030’ queremos contribuír para avanzar cara á practica, pois somos nós mesmos os que mellor coñecemos este territorio e temos a responsabilidade de definir unha estratexia axeitada que sirva para dar resposta á necesidades sentidas”.

“O obxectivo principal é transformar dúas rexións periféricas nunha única área central. Temos excelentes condicións para sermos un territorio común, cuando naturalmente xa o é, pero hai que superar barreiras burocráticas sentidas na educación, na saúde, na xestión d río Miño, entre outras que soamente cunha actuación supra rexional poden ser superadas”, concluíu o alcalde portugués.

Por último, o director da Fundación Centro de Estudos Euro Rexionais, Valerià Paül, calificou o proceso de “éxito” e valorou a alta participación e implicación da sociedade civil. Paül adiantou que “tras estes meses de traballo hai moitas modificacións no documento borrador que se presentou no I Fórum, o cal é unha magnifica noticia porque quere dicir que se debateu de verdade, e anunciou que se recolleron preto dun centenar de propostas que formarán parte do ‘Plan de Acción do Río Miño Transfronteirizo 2030’”.

Paül destacou ademais a importancia deste estudo que “non foi realizado por unha consultora, senón que foi debatido e matizado pola sociedade civil” e incidiu en que a importancia do documento á hora de solicitar fondos europeos reside precisamente en saber primeiro que é o que queremos ser, e en que queremos investir eses cartos xa que moitas veces se solicitan axudas sen saber para que fan falla”.

O II Fórum do Río Miño Transfronteirizo, que se celebrará no Auditorio de Goián, en Tomiño, o vindeiro 29 de novembro será o espazo elixido para aportar os últimos matices á elaboración da estratexia Río Miño Transfronteirizo 2030, que se presentará a en xaneiro de 2019. O Fórum comezará ás 10:30 e rematará ás 14:30 cun brunch/networking. As inscricións son gratuítas e poden facerse aquí.

A Estratexia de Cooperación Intelixente do río Miño Transfronteirizo enmárcase no proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 % por fondos FEDER, cun orzamento total de 942.022,47 euros.




II FÓRUM DO RÍO MIÑO TRANSFRONTEIRIZO

29 de novembro de 2018

Auditorio de Goián-Tomiño

 

Organizan: Deputación de Pontevedra, AECT Río Minho, Comunidade Intermunicipal do Alto Minho e Fundación Centro de Estudos Eurorrexionais (FCCER)

Actividade encadrada no proxecto SMART MINHO-ESTRATEXIA DE COOPERACIÓN INTELIXENTE DO RÍO MIÑO TRANSFRONTEIRIZO, cofinanciado nun 75 % polo FEDER a través do POCTEP 2014-2020.

 

 

PROGRAMA

(hora local)

 

10:30 h    Recepción de participantes, recollida das credenciais e documentación

 

11:00 h    Acto de apertura

Participantes:

– Sandra González, alcaldesa de Tomiño

Manuel Reigosa, presidente da Fundación Centro de Estudos Eurorrexionais (FCEER) e reitor da Universidade de Vigo

Carmela Silva, presidenta da Deputación de Pontevedra

Fernando Brito Nogueira, presidente da Câmara municipal de Vila Nova da Cerveira

 

11:30 h  Inicio da sesión

               MESA: A ESTRATEXIA DE COOPERACIÓN DO RÍO MINHO TRANSFRONTERIZO 2030

Presenta e modera: Uxío Benítez, director do Agrupamento Europeo de Cooperación Territorial do Río Miño (AECT Río Miño), deputado de Cooperación Transfronteiriza da Deputación de Pontevedra

“A participación dos actores territoriais no proceso estratéxico”

Relator: Manuel Rodríguez, técnico da FCCER

“A estratexia para o Río Minho Transfronteirizo 2030”

Relator: Valerià Paül, director do FCCER

 

12:30 h  Pausa para o café

 

13:00 h  Inicio da sesión

               MESA: PROPOSTAS DE FUTURO PARA O TERRITORIO TRANSFRONTEIRIZO DO MINHO

Presenta e modera: Fernando Brito Nogueira, vice-director AECT Río Miño, presidente da cámara municipal de Vila Nova de Cerveira

Relatores: 

    · Xavier Martínez Cobas (Universidade de Vigo)

                   · José Rio Fernandes (Universidade do Porto)

                   · Francisco Carballo Cruz (Universidade do Minho)

                   · Sandrina Antunes (Universidade do Minho)

 

13:15 h  Clausura

Xosé Lago García, Subdirector xeral de Acción Exterior e de Cooperación Transfronteiriza da Xunta de Galicia

– Esther Silva, vicepresidenta da Comisão de Cooperação Desenvolvemento Região Norte (CCDR-N)

– Uxío Benítez, director da AECT Río Miño e deputado de Cooperación Transfronteiriza da Deputación de Pontevedra

Jose María Costa, presidente da CIM-Alto Minho

 

13:30 h  Brunch/Networking

 




Uxío Benítez presenta en Bruxelas a Estratexia ‘Río Miño 2030’ e esixe que o investimento de fondos europeos na fronteira sexa real

Tras dúas xornadas de traballo, a visita institucional da AECT Río Miño a Bruxelas rematou hoxe cunha serie de reunións co Comité das Rexións e na sede da Dirección Xeral de Política Rexional e Urbana da Comisión Europea (DG Regio) nas que, segundo informou o director da AECT Río Miño e deputado de Cooperación Transfronteiriza, Uxío Benítez, déronse a coñecer os proxectos que a agrupación está desenvolver neste momento, así como os seus plans de futuro, recibindo unha acollida moi positiva por parte dos diferentes estamentos europeos.

Durante os encontros, un dos principais temas tratados foi a necesidade de garantir que “os fondos europeos destinados ao desenvolvemento de territorios transfronteirizos se invistan realmente sobre estas áreas xeográficas, e non a centos de quilómetros delas ”, segundo explicou Benítez. A este respecto a agrupación tamén se interesou pola tramitación dos regulamentos que rexerán os fondos do vindeiro marco financeiro 2021 – 2027, reclamando que “estas normativas contemplen a focalización do financiamento en proxectos que se desenvolvan especificamente en zonas comúns transfronteirizas”.

Outra cuestión destacada nas reunións foi a presentación da estratexia “Río Miño 2030”, un estudo profundo do territorio transfronteirizo do río Miño que se vén realizando durante os últimos meses baixo a coordinación da AECT. Uxío Benítez apuntou que tras a elaboración deste documento, que inclúe un paquete de accións a desenvolver no territorio, é necesario “contar cunha ferramenta que permita xestionar do xeito máis eficiente os fondos europeos que recibimos” polo que reclamou a formulación dunha “Inversión Territorial Integrada” (ITI) para o río Miño.

Pacto europeo polo clima e a enerxía

Tras reunirse con representantes do movemento polo Pacto dos Alcaldes para o clima e a enerxía, a AECT Río Miño anunciou hoxe que promoverá a adhesión dos concellos do territorio transfronteirizo este movemento europeo.

“O combate contra o cambio climático e a busca da eficiencia enerxética serán un dos proxectos clave da estratexia do Río Miño 2030, que se presentará a finais deste mes no II Fórum do Río Miño Transfronteirizo”, adiantou Benítez. “O val do Miño será un territorio eficiente enerxeticamente, comezando por fixar os obxectivos locais de redución de CO2”.

A propia agrupación adherirase ao pacto e promoverá plans de acción de eficiencia enerxética e de redución dos niveis de CO2 en todos os concellos da rexión ao mesmo tempo que prestará apoio técnico na elaboración dos obxectivos, e da creación e monitorización dos indicadores dos citados plans de acción.

A través do Pacto dos Alcaldes, máis dun millar de autoridades locais e rexionais europeas asumiron o compromiso voluntario de mellorar a eficiencia enerxética e utilizar fontes de enerxía renovable nos seus territorios, propóndose superar o obxectivo da Unión Europea de reducir nun 20% as emisións de CO2 antes do 2020.




Uxío Benítez reclama en Bruxelas un maior financiamento para programas sociais dirixidos á poboación do territorio transfronteirizo

A delegación da AECT Río Miño que se atopa de visita institucional en Bruxelas reuniuse hoxe con Dirección Xeral de Emprego, Asuntos sociais e Inclusión da Comisión Europea. Durante a xuntanza tratáronse diferentes cuestións relacionadas co financiamento de programas sociais e a comitiva tivo a oportunidade de reunirse conxuntamente cos representantes das Unidades Territoriais de España e Portugal, por petición expresa da AECT.

Durante o encontro, o director da AECT Río Miño e deputado de Cooperación Transfronteiriza, Uxío Benítez, puxo de manifesto a necesidade de contar cun maior financiamento para programas sociais de carácter transfronteirizo que permitan, por unha banda, poñer en marcha iniciativas destinadas á empregabilidade da xuventude, e por outra, tratar o problema do avellentamento da poboación nos concellos da fronteira, con iniciativas dirixidas á atención e mellora da calidade de vida das persoas maiores. Do mesmo xeito, Benítez sinalou a importancia de poñer en marcha programas de fixación da poboación nova mediante o apoio a iniciativas transfronteirizas. “Os programas do Fondo Social Europeo, como o Erasmus ou Programa Europeo de Emprego e Innovación Social (EaSI), deben ser utilizados para a fixación da poboación xuvenil da fronteira”, apuntou.

Por último, a delegación acompañou aos representantes dos concellos de Tomiño, A Guarda e Melgaço, que asistiron a unha xuntanza da iniciativa do Pacto polos Alcaldes, movemento europeo no que participan máis dun millar de autoridades locais e rexionais que asumiron o compromiso voluntario de mellorar a eficiencia enerxética e utilizar fontes de enerxía renovable nos seus territorios, propóndose superar o obxectivo da Unión Europea de reducir nun 20% as emisións de CO2 antes do 2020.

Na axenda de mañá están previstos varios encontros con diferentes representantes da DG Regio e do Comité das Rexións e da Comisión de Cooperación Territorial do Parlamento Europeo.




Unha delegación da AECT Río Miño viaxa a Bruxelas para presentar a nova agrupación territorial

Unha delegación da AECT Río Miño, encabezada polo seu director e deputado de Cooperación Transfronteiriza, Uxío Benítez, viaxará mañá a Bruxelas para dar a coñecer a nova agrupación territorial ante a Comisión Europea. Benítez estará acompañado polo vicepresidente da AECT Río Miño, o portugués Fernando Brito Nogueira, pola vogal e deputada de emprego da Deputación de Pontevedra, Montse Magallanes, representantes de diferentes concellos como Tomiño, A Guarda e Melgaço e o secretariado técnico da entidade. Durante a viaxe, a delegación da AECT reunirase con diferentes direccións xerais da Comisión Europea e visitará o Parlamento Europeo.

Segundo avanzou Uxío Benítez, o obxectivo desta visita é presentar a nova AECT Río Miño ante as institucións europeas, así como os proxectos nos que a agrupación está envolta e os seus plans de futuro. Entre as actividades da entidade destacan a súa participación nos proxectos de cooperación transfronteiriza Smart Minho e Visit Rio Minho, ambos cofinanciados por fondos FEDER.

En concreto presentarase a Estratexia Río Miño 2030, un documento realizado ao longo dos últimos meses, baixo a coordinación da AECT Río Miño e elaborado a través de consultas á cidadanía, organización de mesas sectoriais, a implicación das entidades públicas e o asesoramento dun comité científico. O resultado deste traballo, que se presentará no II Fórum do Río Miño Transfronteirizo, é un estudo en profundidade do territorio, o primeiro destas características que se fai nesta área xeográfica, e que será fundamental acadar novos fondos europeos de cooperación durante a próxima década.

Tamén se presentará en Bruxelas o proxecto de creación dun anel verde de sendeiros galego – portugueses en torno ao Río Miño Transfronteirizo. Dentro do anel verde están previstas importantes actuacións como a creación do 1º Parque transfronteirizo de ocio de Europa, situado entre Tomiño e Vila Nova de Cerveira, e a realización dun concurso internacional de ideas para a construción dunha ponte internacional para o tránsito de persoas e bicicletas, que comunicará as marxes galega e portuguesa do parque e dará continuidade aos sendeiros do anel verde.




Apostan pola creación dunha ‘Feira Cultural do Miño’ para reunir industrias e público de ambas beiras do río

A última mesa de participación para elaborar a ‘Estratexia 2030’ do territorio transfronteirizo propón potenciar o comercio nos centros das vilas fronte ás grandes superficies das aforas

 

Crear unha programación cultural propia no territorio transfronteirizo do Miño e poñer en marcha unha feira, un ‘Culturgal do Miño’, que potencie as industrias e actores culturais de ambas beiras do río e os poña en contacto co público: esas deben ser as apostas no eido cultural dentro da eurorrexión. Así o indicaron os participantes na última mesa de traballo organizada dentro do proceso de elaboración da ‘Estratexia 2030’, un documento-guía que busca desenvolver o territorio transfronteirizo dende múltiples perspectivas.

Estas ideas foron expostas por unha trintena de persoas de asociacións culturais, representantes políticos concellos galegos e cámaras municipais, persoal técnico municipal, comunidades de montes e EURES, na súa participación dentro da mesa sectorial ‘Cultura e Comercio Tradicional’ que se celebrou a pasada semana na sede da Agrupación Europea de Cooperación Terrritorial Rio Minho, en Valença.

Neste encontro, cuxo obxectivo era recoller ideas sobre como potenciar a cultura e o comercio na zona transfronteiriza do río, estiveron tamén os relatores Carmen Villarino, profesora de filoloxía galega e portuguesa da Universidade de Santiago de Compostela, e José Alberto Rio Fernandes, presidente da Asociación Portuguesa de Xeógrafos e Catedrático da Universidade de Porto, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia de Cooperación do Río Miño Transfronteirizo 2030’.

En xeral, os participantes na mesa coincidiron en que a día de hoxe a comunidade non ten sentimento de pertenza ao territorio transfronteirizo debido a que este se eliminou da historia común xa dende a escola.  Púxose de manifesto tamén a existencia de trabas burocráticas para contratacións culturais no país veciño, así como  o traballo de voluntariado non remunerado e poucos fondos que desenvolven os colectivos de ambas beiras.

Ante isto,os representantes das asociacións solicitaron a posta en marcha dun circuíto cultural da eurorrexión promovido dende as institucións, que sexa integrante coas entidades locais, e que dispoña dunha maior promoción e comunicación.

Por outra parte, as persoas participantes cualificaron de moi interesante a posibilidade de poñer en marcha unha feira ou evento cultural, un ‘Culturgal’ propio a nivel eurorrexional, onde de xeito anual se reúnan os diferentes actores das industrias culturais da zona e o público xeral nun modelo similar ao que se celebra anualmente na cidade de Pontevedra, con casetas para os promotores participantes, conferencias, presentacións, mesas redondas ou concertos para dar a coñecer as últimas novidades en música, libros, teatro ou cinema galego e portugués, neste caso.

Museo da rexión

Antes do debate conxunto sobre cultura foi a quenda das exposicións dos expertos. A relatora Carmen Villarino destacou a importancia da cultura como elemento diferenciador dun grupo social  e a importancia da identidade cultural. Sinalou que a cultura é unha cuestión transversal, unha ferramenta para a “organización da vida” que aporta un sentimento/orgullo de pertenza a unha única comunidade no territorio. Neste sentido, e dentro do ámbito do territorio transfronteirizo, subliñou que é preciso recuperar e actualizar a historia común e identidade da contorna do Miño.

Para este obxectivo plantexou a posibilidade de crear unha base datos comúns (asociacións, actividades…), mapas de elementos culturais e ferramentas interactivas, así como incluso un posible Museo da rexión ou, de xeito menos ambicioso, exposicións itinerantes con fondos arquivísticos bibliotecarios. Tamén propuxo a denominación de rúas con nomes de persoas galegas ilustres en Portugal e viceversa, aproveitar os instrumentos legais dos que se dispón, e sobre todo, non deixar nunca de lado á poboación local, é quen sustenta a cuestión identitaria.

O comercio, esencia das vilas

Pola súa banda, o relator Rio Fernandes centrou a súa charla na potenciación do comercio tradicional, e subliñou a necesidade de substituír o comercio anónimo das aforas e centros comercias polo comercio do centro das vilas, máis próximo á xente e que aporta calidade de vida. O catedrático lembrou que o comercio ten un papel económico fundamental que non pode ser esquecido, así como unha dimensión social e urbana, posto que é indispensable na constitución das vilas e cidades. Destacou o exemplo da peonalización das rúas de Pontevedra, que definiu como un grande éxito aínda que había unha reticencia inicial porque se consideraba que sería un problema que os coches non puideran chegar ao centro das vilas, cuestión esta última que se demostrou totalmente errónea.

Rio apostou pola cooperación entre comerciantes, e por fomentar a proactividade das institucións con respecto ao comercio. Tamén destacou como interesante facer unha carta de ordenamento comercial, organizar “noites brancas” (establecementos abertos pola noite) en toda a rexión ou por municipios, ou identificar establecementos comerciais singulares (antigos, de mobiliario…).

Mesa sectorial sobre mobilidade

Logo da celebración das dúas primeiras mesas sectoriais, este mércores 3 de outubre terá lugar a próxima, que versará sobre ‘Mobilidade, servizos e turismo sustentable’. Desenvolverase na sede da AECT en Valença ás 17 horas (hora galega)  e contará coa participación de Valerià Paül Carril, Director da Fundación CEER  (Centro de Estudios Eurorrexionais), profesor da Universidade de Compostela, xeógrafo e doutor en Planificación Territorial e Desevolvemento Rexional; e de  Xavier Martínez Cobas, profesor de Economía Financeira e Contabilidade da Universidade de Vigo, que forman parte do equipo científico da Fundación CEER para a elaboración da ‘Estratexia 2030’.

As persoas interesadas en participar nesta mesa sectorial poderán inscribirse a través da páxina web www.smartminho.eu/participa.  Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

A Estratexia de Cooperación Intelixente do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




Axentes sociais do territorio do Miño ven necesario un convenio transfronteirizo de emerxencias e máis coordinación na loita contra o lume

Éxito de participación cidadá na primeira mesa sectorial celebrada este luns no marco da ‘Estratexia de Cooperación 2030’

 

Axentes sociais do territorio do Miño ven necesario que as administracións galega e portuguesa asinen un convenio transfronteirizo de emerxencias e aumenten a súa coordinación na loita contra o lume. Así o manifestaron representantes de entidades económicas, sociais e culturais, e persoal técnico e político de ambas marxes do río durante a celebración da primeira mesa sectorial de participación para elaborar a ‘Estratexia de Cooperación do Río Miño Transfronteirizo 2030’, un documento que servirá de guía para desenvolver o territorio.

A primeira mesa de traballoda Estratexia -titulada ‘A gobernanza no territorio transfronteirizo’- desenvolveuse este luns no edificio Área Panorámica de Tui e contou con máis participación da prevista pola organización, que definiu a convocatoria como “un éxito”. O encontro foi a primeira xuntanza interactiva na que os axentes socioeconómicos da zona puideron expresar as súas inquedanzas e propostas sobre o futuro da contorna do Miño. Sobre a mesa púxose o debate do papel que deben xogar as diferentes administracións e incluso a AECT Rio Minho nos problemas da poboación transfronteiriza.

No caso das emerxencias, os asistentes consideraron prioritario ter unha maior coordinación entre a parte galega e lusa, poñendo como exemplo o caso do paracaidista que tiña que ser rescatado ao ter problemas cando sobrevoaba o territorio transfronteirizo: en terra non saía ningún equipo de rescate de ningunha de ambas marxes porque os mandos consideraban que a emerxencia non entraba dentro das súas competencias nin ámbito de actuación.

Por outra banda, tamén se tratou a importancia de dispor dunha acción coordinada e conxunta no ámbito da loita contra o lume, unha política forestal global que aborde tanto medios e equipamentos de extinción como liñas para a prevención. No debate lembráronse os lumes do pasado ano, cando as lapas sobrepasaron o río Miño dende a parte portuguesa chegando cunha grande virulencia á provincia.

‘Know-how’ transfronteirizo

A mesa sectorial iniciouse coa presentación realizada pola  profesora de Relacións Internacionais e Administración Pública de Universidade do Minho, Sandrina Antunes, quen destacou a importancia de reforzar a Agrupación de Cooperación Territorial Rio Minho (AECT-Rio Minho), a través dunha coordinación eficaz coas entidades públicas e privadas, así como dun proceso participativo continuado coa cidadanía. Así mesmo, insistiu na conveniencia de  tirar partido do ‘know-how’ xa existente en materia de cooperación transfronteiriza e na procura de novas oportunidades de financiamento que permitan que se consolide como unha estrutura xurídica autosostible.

A continuación foi a quenda dos asistentes  á mesa, que fixeron fincapé na necesidade da creación dunha cidadanía compartida que se traduza en servizos comúns. Moitas das persoas participantes expuxeron o anhelo de que a AECT actúe como interlocutor entre as autoridades locais e os gobernos estatais e rexionais en materia de cooperación transfronteiriza, así como para representar os intereses do territorio en Bruxelas.

Durante as intervencións participaron tamén representantes da AECT Galiza-Norte de Portugal, resaltando a importancia dunha colaboración fluída entre ambas AECT para unir esforzos e identificar obxectivos comúns. Pola súa banda, representantes asociativos manifestaron tamén o seu interese en incrementar a colaboración coa AECT Rio Minhoe con outros colectivos da zona para potenciar a cooperación.

A seguinte mesa sectorial, sobre ‘Cultura e comercio tradicional’, terá lugar este xoves 27 de setembro ás 17 horas (hora galega)  na sede da AECT en Valença. Contará coa participación de Carmen Villarino, profesora de filoloxía galega e portuguesa da Universidade de Santiago de Compostela, e de José Alberto Rio Fernandes, presidente da Asociación Portuguesa de Xeógrafos e Catedrático da Universidade de Porto, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia 2030’.

As persoas interesadas en participar nestamesa sectorial poderán inscribirse a través da páxina web www.smartminho.eu/participa. Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

A Estratexia de Cooperación Intelixente do rio MinhoTransfronteirizo enmárcase dentro do proxecto SmartMinho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




Primeira xornada de participación pública para elaborar a ‘Estratexia 2030’ coa que desenvolver o territorio do Miño

A AECT fai un chamamento aos axentes económicos e sociais da zona para que asistan este luns á mesa sectorial sobre ‘Gobernanza no territorio transfronteirizo’

A nova fase de participación para elaborar a ‘Estratexia de Cooperación do Río Miño Transfronteirizo 2030’ arranca este luns 24 de setembro en Tui coa celebración da primeira mesa sectorial titulada “A gobernanza no territorio transfronteirizo”.  Trátase do primeiro encontro interactivo coa poboación para elaborar de maneira consensuada un documento guía sobre como desenvolver as potencialidades do territorio: a intención é acadar unha boa participación dos axentes socioeconómicos da zona para que expresen as súas propostas, inquedanzas e visión sobre cal debe ser o futuro do territorio do Miño.

A mesa sectorial terá lugar no edificio Área Panorámica ás cinco da tarde e nela tomarán parte a profesora de Relacións internacionais e Administración Pública de Universidade do Minho, Sandrina Antunes, e o profesor de Economía Financieira e Contabilidade da Universidade de Vigo, Xavier Martínez Cobas, que forman parte do equipo científico da Fundación CEER (Centro de Estudios Eurorrexionais) para a elaboración da ‘Estratexia 2030’.

As persoas interesadas en participar na mesa sectorial poderán inscribirse a través da páxina web www.smartminho.eu/participa. Así mesmo, aquelas persoas que non poidan asistir ás mesas sectoriais poderán sumarse igualmente ao proceso de participación cidadá, aportando as súas achegas e suxestións a través da páxina web, no ‘Espazo virtual transfronteirizo de participación cidadá’ habilitado con esa finalidade e que estará aberto ata finais de outubro.

As seguintes mesas sectoriais que se celebrarán abordarán a ‘Cultura e comercio tradicional’, o 27 de setembro en Valença; ‘Mobilidade, os servizos e os turismo sustentable’, o 3 de outubro tamén en Valença; e ‘Sectores produtivos’, o 8 de outubro en Tui . Todas elas serán ás cinco da tarde (hora galega).

Detrás da Estratexia de Cooperación Intelixente do Río Miño Transfronteirizo, coñecida como ‘Estratexia 2030’, está un programa de actuación conxunta dos actores públicos e privados do territorio do río Miño na área do norte de Portugal e sur da provincia de Pontevedra. Este traballo de análise profunda do espazo transfronteirizo ten como horizonte futuro o novo marco financeiro europeo 2023-2027 e rematará a finais de ano coa celebración do II Fórum do Río Miño Transfronteirizo.

‘A Estratexia 2030’ pretende desenvolver un plan de acción e implementar un proceso capaz de involucrar aos actores públicos e privados (axentes económicos e sociais presentes no territorio) co fin de ser un documento-guía da orientación das políticas públicas de desenvolvemento da área transfronteiriza do río Miño, orientado e integrado nunha perspectiva de valoración e uso económico e sustentable dos recursos do río internacional.

A encargada de impulsar a Estratexia é Agrupación de Cooperación Territorial Río Miño (AECT-Río Miño),  constituída pola Deputación de Pontevedra no territorio do Miño pontevedrés, e pola Comunidade Intermunicipal do Alto Minho portugués (CIM Alto Minho).

A Estratexia de Cooperación Intelixente do rio Minho Transfronteirizo enmárcase dentro do proxecto Smart Minho a través do Programa Operativo de Cooperación Transfronteiriza España-Portugal 2014-2020 (INTERREG V-A) e está cofinanciado ao 75 %, cun orzamento total de 942.022,47 euros.




A AECT Río Miño constitúe a súa asemblea xeral e comeza a traballar no seu plan de actividades para o 2018

A Agrupación Europea de Cooperación Territorial (AECT) Río Miño, constituíu hoxe a súa asemblea xeral, nun acto celebrado na sé da agrupación en Valença e presidido pola presidenta da Deputación de Pontevedra, Carmela Silva; o presidente da Comunidade Intermunicipal do Alto Minho, José María Costa; e o novo director da Agrupación, o deputado de Cooperación Transfronteiriza Uxío Benítez.

A celebración comezou coa toma de posesión dos integrantes da mesa, composta por vinte alcaldes e alcaldesas de Galiza e Portugal. En representación da franxa galega foron nomeados como delegados os rexedores e rexedoras dos concello de Arbo, As Neves, Salvaterra do Miño, Tui, Salceda de Caselas, Tomiño, O Rosal, A Guarda, Ponteareas e O Porriño. No referente ao territorio portugués, tomaron posesión os dez concellos que forman parte da CIM Alto Minho: Arcos de Valdevez, Monçao, Melgaço, Valença, Vilanova da Cerveira, Paredes de Coura, Ponte de Lima, Ponte da Barca e Viana do Castelo. Como presidente da mesa da asemblea resultou elixido o alcalde de Viana do Castelo e presidente do CIM Alto Minho, José María Costa, e pola súa parte, Marcos Besada, alcalde de Salceda de Caselas, foi designado como secretario, cargo que ambos ostentarán durante os próximos dous anos.

A presidenta da Deputación, Carmela Silva, destacou na constitución da asemblea da AECT Río Miño que “o mundo e os territorios soamente se cambian con xente que ten a forza e convicción de crer que se pode facer. Esta AECT nace porque hai moitas alcaldesas e alcaldes, moitas presidentas e presidentes de Cámaras Municipais, que cren nas potencialidades do seu territorio, que saben cales son as súas necesidades, e están dispostas e dispostos a construílo”.

Neste contexto, Silva amosou a súa satisfacción porque as persoas integrantes da Agrupación “vimos do mundo local e sabemos que neste mundo global o local xoga un papel fundamental para o desenvolvemento do territorio, pero tamén dos dereitos que a cidadanía debe ter e os servizos que se precisan para dar resposta ás súas demandas”. Para acadar estes obxectivos, a presidenta provincial destacou a necesidade de que o local ocupe maior espazo e xogue un papel na xestión e definición dos fondos europeos. “Ata o de agora as decisións están moi centralizadas nos estados e o local xoga moi pouco papel cando, sen embargo, somos nós quen damos resposta ás políticas de proximidade e de desenvolvemento do futuro”, asegurou a presidenta da Deputación.

Sobre a AECT Carmela Silva destacou o importante papel que desenvolve para “conseguir que se escoite ao mundo local tanto en Portugal como en España e para promover de xeito intelixente o territorio”. Neste eido, a presidenta provincial avanzou que neste mesmo mes de xuño a FEMP vai organizar en Pontevedra unha reunión do Norte de Portugal e Galicia para reflexionar sobre os novos retos do mundo local e a necesidade dun maior protagonismo para o municipalismo.

Plan de actividades 2018

O director da AECT Río Miño e deputado de Cooperación Tranfronteiriza, Uxío Benítez, explicou que a constitución da asemblea da agrupación foi “o último paso na formalización do esquema da AECT, e que partir deste momento comeza o traballo de desenvolvemento do plan de actividades para o 2018”.

Uxío Benítez sinalou que “este será un ano de transición dalgunhas das responsabilidades de xestión e seguimento de proxectos e expedientes ata agora asumidos pola xa desaparecida Uniminho”. Así mesmo, o deputado provincial adiantou que “entre as actuacións máis relevantes que afrontará a AECT nos próximos meses estará a consolidación institucional da agrupación na rexión, a promoción da coordinación dos proxectos transfronteirizos Smart Minho e Visit Rio Minho ou a promoción e a participación en novas candidaturas con financiamento europeo”.

A AECT Río Miño nace co obxectivo de contribuír ao desenvolvemento e reforzar a cohesión económica e social do seu territorio. Ten como atribucións articular o espazo común, promover as relacións de cooperación territorial, aumentar a cohesión institucional do territorio de ambas marxes do rio Miño, promover o seu patrimonio cultural e natural, valorizar as potencialidades dos recursos endóxenos e consolidar unha marca turística común para os dous países.

Os dous socios principais da AECT son a Deputación de Pontevedra e a CIM Alto Minho, que aglutinan 16 concellos pontevedreses (A Guarda, O Rosal, Oia, Tomiño, Tui, O Porriño, Salceda de Caselas, Salvaterra de Miño, Ponteareas, As Neves, Mondariz, Mondariz-Balneario, Arbo, Crecente, A Cañiza e Covelo) e outros dez do norte de Portugal, abranguendo máis de tres mil quilómetros cadrados de territorio e 375.995 habitantes.

A creación da AECT Rio Minho foi impulsada polas accións de Estratexia de Cooperación Intelixente Transfronteiriza do proxecto Smart Minho, que conta cunha inversión de orzamento de 942.022,47 euros, cofinanciado ao 75% polo programa INTERREG VA POCTEP, fondos FEDER da Unión Europea.

Foto de Familia da Asemblea ACET Río Miño




Uxío Benítez, elixido director da nova Agrupación Europea de Cooperación Territorial Rio Minho

Uxío Benítez, elixido director da nova Agrupación Europea de Cooperación Territorial Rio Minho

A Agrupación Europea de Cooperación Territorial (AECT) Rio Minho vén de iniciar a constitución formal dos seus órganos co nomeamento do seu primeiro director: o deputado de Cooperación Transfronteiriza, Uxío Benítez. O mandato do nacionalista á fronte da nova entidade de cooperación durará dous anos e no 2020 pasará ao rexedor da Câmara Municipal de Vila Nova de Cerveira, Fernando Nogueira.

Uxío Benítez subliñou que “o reto durante estes dous anos de mandato será consolidar a AECT nun instrumento de política transfronteiriza no territorio do Miño”. Así mesmo, asegurou que a entidade “estará ao servizo da cidadanía e de todos os concellos e cámaras municipais que a conforman”. O responsable provincial quixo lembrar unha vez máis a relevancia do nacemento desta nova entidade e da “importancia desta área de actuación”, encadrada no medio do eixo Vigo-Porto (con 3,5 millóns de habitantes) e na que se desenvolven practicamente a metade dos fluxos de vehículos lixeiros entre España e Portugal.

Segundo establecen os estatutos da nova AECT, a dirección terá sempre carácter rotatorio bianual e alternarase entre os dous socios que a conforman: a Deputación de Pontevedra e a CIM Alto Minho. Deste xeito, durante os dous primeiros anos o cargo de vicedirector recaerá nun representante portugués e despois pasará a un representante da Deputación de Pontevedra. Ademais da dirección, o novo organismo tamén conta xa cun Consello de Coordinación composto pola deputada Monste Magallanes e o presidente da Cámara Municipal dos Arcos de Valdevez, ambos en calidade de vogais da institución.

A constitución da Asamblea Xeral, en maio

Segundo adiantou o deputado de Cooperación Transfronteiriza Uxío Benítez, o seguinte paso dentro do proceso de formalización da AECT será a constitución da Asemblea Xeral, prevista para o vindeiro mes de maio, e na que previsiblemente estarán representadas as cámaras municipais e concellos do territorio do Miño.

A AECT Río Minho é un novo instrumento estable de desenvolvemento con personalidade xurídica propia que ten por obxectivo a defensa da xestión compartida dos servizos entre todos os actores existentes en torno ao río Miño. Así mesmo, a entidade ten capacidade para optar a fondos europeos e xestionalos, así como promover e organizar accións de cooperación no territorio de forma directa.

Os dous socios principais da AECT son a Deputación de Pontevedra e a CIM Alto Minho, que aglutinan 16 concellos pontevedreses (A Guarda, O Rosal, Oia, Tomiño, Tui, O Porriño, Salceda de Caselas, Salvaterra de Miño, Ponteareas, As Neves, Mondariz, Mondariz-Balneario, Arbo, Crecente, A Cañiza e Covelo) e outros dez do norte de Portugal, abranguendo máis de tres mil quilómetros cadrados de territorio e 375.995 habitantes.

O impulso para a creación da AECT Rio Minho encádrase dentro das accións de Estratexia de Cooperación Intelixente Transfronteiriza do proxecto Smart Minho liderado pola Deputación de Pontevedra, que acadou un investimento de 942.022,47 euros, dos que o 75% están cofinanciados polo programa INTERREG VA POCTEP dentro dos fondos FEDER da Unión Europea.




O Miño, unha fronteira que une

O Miño é unha fronteira natural que, lonxe de separar, une. A fronteira máis poboada entre España e Portugal, con preto de 376.000 habitantes, serve de nexo de unión para unha rexión de gran valor turístico, patrimonial e ambiental e cun valor cultural e lingüístico común.